اسلام آباد۔15جون (اے پی پی):وفاقی وزیرداخلہ محسن نقوی آکھیے ایف سی دے افسراں تے جواناں دہشتگردی دے خلاف جنگ اچ بہادری دیاں داستاناں رقم کیتن ،فرنٹیئر کانسٹیبلری دی پشاور سودھے خیبر پختونخوا اچ قیام امن سانڳے وݙیاں خدمات ہن ، وزارت داخلہ توں ہفتے کوں جاری بیان موجب وفاقی وزیرداخلہ اے ڳالھ فرینٹر کانسٹیبلری دے شب قدر قلعہ دا دورہ کرݨ دے موقع تے آکھی اے ۔ وزیرداخلہ آکھیے جو قوم کوں ایف سی دے جری سپوتاں تے ناز اے۔ کمانڈنٹ ایف سی معظم جاہ انصاری وفاقی وزیرداخلہ محسن نقوی کوں قلعہ دے تاریخی پس منظر تے بریفنگ ݙتی ۔ وزیرداخلہ تاریخی قلعہ دی ݙیکھ بھال تے کمانڈنٹ ایف سی تے انہاں دی ٹیم دی کارکردگی دی تعریف کیتی تے آکھیے جو قلعہ ھک تاریخ سموئی ہوئی اے ۔ وفاقی وزیرداخلہ محسن نقوی وزیٹرز بک اچ تاثرات وی درج کیتن ۔ وفاقی وزیرداخلہ 1813 دے بݨیے ہوئے تاریخی قلعہ دا دورہ کیتے تے قلعہ دے مختلف پراݨے حصے ݙٹھے ، وفاقی وزیرداخلہ زنجیراں اچ جکڑیے قلعہ دے اصلی اتے پراݨے دروازیں اچ گہری دلچسپی ڳھدی ۔ انہاں برطانیہ دے سابق وزیر اعظم سر ونسٹن چرچل دا مجسمہ اتے 1837 اچ بݨݨ آلا دیار دی لکڑی دا ریسٹ ہاؤس وی ݙٹھا ریسٹ ہاؤس اچ سر ونسٹن چرچل ستمبر 1897 اچ قیام کیتا ہئی ۔رنجیت سنگھ دے دور اچ ماہر تعمیرات طوطا رام قلعہ تعمیر کرایا اتے ایندا ناں شنکر گڑھ رکھیا ڳیا ۔
