اسلام آباد – 05 –جولاءِ (اي پي پي) اطلاعات ۽ نشريات واري وفاقي وزير مريم اورنگزيب چيو آهي ته تحريڪ انصاف جي پنهنجي ماڻهن پاناما سازش کي بي نقاب ڪيو، سازشي ڪردارن هڪ نالائق کي مڙهي ملڪ کي تباهي طرف ڌڪيو، ملڪ جي مسئلن جو حل رڳو نواز شريف وٽ آهي، ان کي پاڪستان جي عوام ووٽ ڏئي ٽيون ڀيرو وزيراعظم چونڊيو، نواز شريف دور ۾ معيشت مستحڪم ٿي، عوام کي سي پيڪ جو تحفو ڏنو، ملڪ جي وڏي خدمت ڪندڙن سان وڏي زيادتي ٿي، جيڪي شڪليون ۽ ڪردار اڄ ملڪ ساڙي رهيا آهن، اهي 14 – 2013ع ۾ سي پيڪ منصوبو روڪڻ جي لاءِ ڪنٽينر تي بيٺل هئا. پريس ڪانفرنس کي خطاب ڪندي اطلاعات واري وفاقي وزير چيو ته اڄ 5 جولاءِ جو ڏينهن آهي ۽ اڄ جي ڏينهن هڪ آمر شهيد ذوالفقار علي ڀٽو جي حڪومت تي راتاهو هڻي جمهوريت جو قتل ڪيو هو، اڄ ڪيپٽن ڪرنل شير خان شهيد جي ورسيءَ جو به ڏينهن آهي ۽ اڄ سي پيڪ جا 10 سال به مڪمل ٿي رهيا آهن. هن چيو ته سي پيڪ پاڪستان ۽ چين جي قيادت جو خطي ۽ پاڪستان جي عوام جي لاءِ تحفو آهي، اهو منصوبو قائد نواز شريف ۽ صدر شي جن پنگ جو ويزن آهي. هن چيو ته سي پيڪ منصوبي پاڪستان کي 2013ع کان 2018ع تائين هر شعبي ۾ ترقي ڏني پر گذريل چار سالن ۾ هڪ سازشي، نااهل، نالائق ۽ چور ملڪ کي رڳو تباهي طرف ڌڪيو. هن چيو ته وزيراعظم شهباز شريف اتحادي حڪومت سان گڏجي گذريل هڪ سال دوران ملڪ جي معاشي تباهي، بدحالي، بيروزگاري، لوڊشيڊنگ ۽ دهشتگردي ختم ڪرڻ جي ڪوششن ۾ مصروف آهي. هن چيو ته سازشي عنصرن هڪ نااهل، نالائق ۽ چور کي ملڪ تي مڙهيو، اها ڪهاڻي رڳو چار سال جي نه آهي، ان جي شروعات 2013ع ۾ ٿي چڪي هئي. 2013ع ۾ به ملڪ جي اندر مهانگائي، دهشتگردي، بيروزگاري هئي، ملڪ ڊيفالٽ جي ويجهو هو ۽ ماڻهن سمجهي ورتو هو ته ملڪ جي مشڪلاتن جو حل رڳو نواز شريف وٽ آهي، عوام نواز شريف کي ووٽ ڏئي ٽيون ڀيرو وزيراعظم چونڊيو، ان وقت پاڪستان هڪ مشڪل ٻه واٽي تان گذري رهيو هو، نواز شريف ملڪ ۾ سياسي استحڪام جو بنياد رکيو، صوبن ۾ اڪثريت رکندڙ پارٽين کي اتي حڪومتون ٺاهڻ جو موقعو ڏنو، نواز شريف ٽن سالن ۾ ملڪ جي خراب صورتحال بدلائي هئي. هن چيو ته جيڪي ڪردار اڄ ملڪ ساڙي رهيا آهن ۽ معاشي تباهي پيدا ڪري رهيا آهن، اهي ئي ڪردار 14 – 2013ع ۾ سي پيڪ منصوبو روڪڻ جي لاءِ ڪنٽينر تي هئا. 2013ع ۾ پي ٽي آءِ ملڪي استحڪام جي خلاف سازش ۾ مصروف هئي، سي پيڪ جو منصوبو شروع ٿيندي ئي سازشي عنصر متحرڪ ٿي ويا هئا. هن چيو ته جڏهن صدر شي جن پنگ جي پاڪستان جي دوري جي خبر آئي ته هڪ شخص ملڪ جي ترقي جي خلاف ڪنٽينر تي بيٺل هئا، ان شخص سول نافرماني جي تحريڪ جي ڪال ڏني، سي پيڪ منصوبي تحت توانائي جا منصوبا لڳڻا هئا، روزگار پيدا ٿيڻو هو ۽ اهو شخص ان منصوبي جي خلاف بيٺل هو. هن چيو ته اڄ اهو شخص آءِ ايم ايف جي پروگرام تي رڙيون ڪري رهيو آهي جڏهن ته اهو پروگرام اسان نه آندو هو، ان تي اسان صحيحون نه ڪيون هيون. هن چيو ته نواز شريف ملڪي معيشت کي استحڪام ڏنو، آءِ ايم ايف کي خُدا حافظ چيو، 2017ع ۾ ملڪ ترقي جي راهه تي گامزن ٿي چڪو هو. هن چيو ته ملڪي تاريخ جو واحد آءِ ايم ايف پروگرام هو جيڪو نواز شريف جي دور ۾ مڪمل ٿيو. نواز شريف ملڪ جي نوجوانن کي خودمختيار بڻائڻ چاهيندو هو هو ملڪ جي اندر آءِ ٽي، زراعت، روانگي واپار کي فروغ ڏيڻ چاهيندو هو، ان جو ويزن ملڪي معيشت کي مستحڪم بڻائڻ هو ۽ اهو ڪم هن ڪري ڏيکاريو، رڳو نعرا نه لڳايا. هن چيو ته ملڪ جي اندر 2013ع کان 2017ع تائين 14 هزار ميگاواٽ بجلي پيدا ڪئي، دهشتگردي جو خاتمو ڪيو، پاڪستان جي تاريخ جي سڀ کان وڏي دهشتگردي جي خاتمي جا آپريشنز شروع ڪيا جڏهن ته ٻئي طرف ترقي جي منصوبن کي روڪڻ جي لاءِ هڪ شخص ڪنٽينر تي بيٺل هو. مريم اورنگزيب چيو ته ملڪ جي وڏي خدمت ڪندڙ سان وڏي زيادتي ڪئي وئي، پاناما جو فيصلو اقامي ۾ تبديل ٿيو. هن چيو ته نواز شريف جي خلاف ان لاءِ سازش ڪئي پئي وئي ته هو عوام کي روزگار ۽ ڪاروبار ڏئي رهيو هو، ملڪ مان اونداهين جو خاتمو ڪري رهيو هو. اڄ پي ٽي آءِ جا ماڻهو به ان ڳالهه جي گواهي ڏئي رهيا آهن ته نواز شريف سان زيادتي ٿي. پريس ڪانفرنس دوران اطلاعات واري وفاقي وزير پاڪستان تحريڪ انصاف جي سينيئر اڳواڻ حامد خان جي نجي ٽي وي چينل سان ٿيندڙ ڳالهه ٻولهه جو وڊيو ڪلپ شيئر ڪندي چيو ته اهڙي طرح جي ڳالهه ٻولهه شيخ رشيد ۽ اعجاز شاهه به ڪئي هئي جن جو مسلم ليگ (ن) سان ڪو تعلق نه هو. اطلاعات واري وفاقي وزير چيو ته پاناما کي اقامي ۾ تبديل ڪري نواز شريف کي نااهل ڪيو ويو جيڪا ملڪ جي عوام سان دشمني هئي. اطلاعات واري وفاقي وزير چيو ته عمران خان جي حڪومت آءِ ايم ايف جي مشڪل شرطن تي صحيحون ڪري ملڪ کي آءِ ايم ايف جي حوالي ڪري وئي، ملڪي ساک کي تباهه ڪيو، ٻيهر کان لوڊشيڊنگ شروع ڪئي. هن چيو ته هڪ طرف سموريون قوتون نواز شريف کي زيرو ڪرڻ جي چڪر ۾ هيون پر مڪافات عمل آهي جيڪي ماڻهو اهو ڪري رهيا هئا اڄ انهن جي منهن تي چماٽ پئجي رهيا آهن. اهي ڪنهن پبلڪ ايريا ۾ نه ٿا وڃي سگهن. هن چيو ته پاڪستان جي عوام سمجهي ٿي ته جيڪڏهن ڪو شخص هن ملڪ کي بحرانن مان ڪڍي سگهي ٿو ته ان جو نالو نواز شريف آهي. اطلاعات واري وفاقي وزير چيو ته نواز شريف پنهنجي مٿان لڳندڙ هر الزام تي قانون آڏو پيش ٿيو. نواز شريف 150 کان وڌيڪ پيشيون ڀوڳيون. هن چيو ته اڄ هڪ طرف ملڪ کي ترقي ڏيندڙ، عوام جي خدمت ڪندڙ، عوام کي روزگار ڏيندڙ، ڪاروبار ڏيندڙ شخصيت آهي ۽ ٻئي طرف نااهل، فراد، چور ۽ ڪرپٽ شخص آهي جنهن ملڪ کي باهه ڏني، ملڪ جي ترقي کي منفي ۾ وٺي ويو، نوجوانن جو روزگار کسيو، ملڪ کي قرضن جي بار هيٺ دفن ڪيو، سي پيڪ کي منجمند ڪيو. هن چيو ته اسان 14 مهينن جي مسلسل محنت سان آءِ ايم ايف جو معطل پروگرام بحال ڪيو، اهو خالي آءِ ايم ايف جو پروگرام نه هو، اهو ملڪ جي ساک ۽ اقتصادي بحالي جو پروگرام هو. هن چيو ته گذريل حڪومت سي پيڪ منصوبو بند ڪيو، چين کي ناراض ڪيو، سي پيڪ منصوبي ۾ ڪرپشن تي بيان ڏنا ويا. هن چيو ته هڪ سال جي سي وي جي چار سال جي سي وي سان ڀيٽ نه ڪئي وڃي ته وزيراعظم شهباز شريف ملڪ جي معيشت کي ٻيهر استحڪام ڏنو آهي. صحافين جي سوالن جا جواب ڏيندي اطلاعات واري وفاقي وزير چيو ته عمران خان جڏهن گرفتار ٿيو ته شهيدن جون يادگارون ساڙيون ويون پر ان کي گڊ ٽو سي يو چيو ويو. فارن ميڊيا کي پنهنجي انٽرويو ۾ عمران خان پنهنجي ڪافي عزت ڪرائي چڪو آهي، هر وقت ڪوڙ جي ذريعي ڪنهن کي بيوقوف نه ٿو بڻائي سگهجي. هن چيو ته ان جي چوري جون ڪهاڻيون اسان وٽ اچي چڪيون آهن اسان قانون جي حوالي ڪيون. هن چيو ته جاچ جو جواب بالٽي، دٻي ۽ ڊسٽ بن سان نه ٿو ڏئي سگهجي. هڪ ٻئي سوال تي هن چيو ته 2013ع ۾ ملڪ ۽ ملڪ جي چونڊيل وزيراعظم جي خلاف سازش ٿي، اصل ۾ اها سازش پاڪستان جي 22 ڪروڙ عوام سان ظلم هو، اهڙن ڪردارن کي پاڪستان جي عوام ڪڏهن به معاف نه ڪندي.
