ڪراچي – 26 – جولاءِ (اي پي پي) وزيراعظم محمد شهباز شريف چيو آهي ته وفاق، سنڌ حڪومت، ڊونرز سان گڏجي ٻوڏ متاثرين جي لاءِ 20 لک گهر ٺاهڻ جي منصوبي تي ڪم ڪري رهي آهي، اهڙو بنيادي ڍانچو جوڙڻ اولين ترجيح آهي جنهن سان مستقبل ۾ ڪنهن به ٻوڏ واري صورتحال کي منهن ڏئي سگهجي. اهڙن خيالن جو اظهار هن سنڌ جي ٻوڏ متاثرين کي گهرن جون چاٻيون ۽ مالڪاڻا حق ڏيڻ جي تقريب کي خطاب ڪندي ڪيو. هن چيو ته گذريل سال پاڪستان ۾ تاريخ جي بدترين ۽ تباهي آڻيندڙ ٻوڏ آئي، پرڏيهي وزير بلاول ڀٽو زرداري ۽ سنڌ جي وڏي وزير سيد مراد علي شاهه سان گڏ پاڻ ٻوڏ سٽيل علائقن جو دورو ڪيو. هن چيو ته ٻوڏ جي تباهين کي منهن ڏيڻ هڪ وڏو چئلينج هو، وفاقي حڪومت صوبائي حڪومتن اين ڊي ايم اي سان گڏجي ان چئلينج جو مقابلو ڪيو. هن چيو ته ٻوڏ دوران سرنديءَ وارن ماڻهن دل کولي متاثرين جي مدد ڪئي جيڪا ساراهه جوڳي آهي. هن چيو ته اسان جي پهرين ترجيح آهي ته اهڙو بنيادي ڍانچو جوڙيو وڃي جنهن سان مستقبل ۾ ڪنهن به ٻوڏ واري صورتحال کي منهن ڏئي سگهجي. وزيراعظم چيو ته حبيب بئنڪ لميٽيڊ ٻوڏ متاثرين جي لاءِ سنڌ جي 2 ضلعن جي ٻن ڳوٺن ۾ گهر ٺاهي نيڪي جو ڪم سرانجام ڏنو آهي، ڪيپٽن رٽائرڊ شجاعت عظيم ڊيره اسماعيل خان جي علائقي ٽانڪ ۾ پڻ ٻوڏ متاثرين کي هڪ سئو گهر فراهم ڪيا. شهباز شريف چيو ته وفاق، سنڌ حڪومت، ڊونرز سان گڏجي ٻوڏ متاثرين جي لاءِ 20 لک گهر ٺاهڻ جي منصوبي تي ڪم ڪري رهي آهي، ان منصوبي سان ٻوڏ متاثرين جي ڏکن جو مداوو ٿيندو. وزيراعظم اين ڊي ايم اي، پي ڊي ايم اي، صوبائي ۽ وفاقي ادارن ۽ سنڌ حڪومت جي ٻوڏ متاثرين جي بحالي جي لاءِ ڪوششن کي ساراهيو. ان موقعي تي وزيراعظم محمد شهباز شريف متاثرين کي گهر حاصل ڪرڻ تي مبارڪباد ڏني. ڪمشنر حيدرآباد منصوبي بابت بريفنگ ڏني. بعد ۾ وزيراعظم محمد شهباز شريف سنڌ جي گورنر ۽ سنڌ جي وڏي وزير سان گڏ ڄامشورو جي ڳوٺ قادر بخش هڪڙو جي ٻوڏ متاثرين کي گهرن جون چاٻيون ۽ مالڪاڻي حقن جا ڪاغذ ڏنا.
