اسلام آباد۔24جولائی (اے پی پی) وزیر اعظم محمد شہباز شریف ملک اچ اڄوکی دہشت گردی دی لہر تے افسوس کریندیں ہوئیں آکھیا جو دہشت گردی دی اڄوکی لہر پاکستان دے خلاف منظم سازش اے۔ بدقسمتی نال تحریک طالبان پاکستان افغانستان دی سر زمین پاکستان دے خلاف دہشت گردی اچ استعمال کریندے پئن۔ اساں آپݨے شہریاں دی حفاظت کیتے پورے تیار ہیسے۔ اساں چاہندوں جو معاملے امن تے مذاکرات نال طے تھیسن۔ خطے اچ امن نال ترقی تھیسی۔ نو مئی کوں پاکستان دی بنیاداں ہلاوݨ اچ ملوث ٹولہ پاکستان دے پرامن شہریاں اتے پاک فوج دے خلاف اے جیڑھا کہیں صورت قبول کائنی۔ منگل کوں وفاقی کابینہ دے اجلاس توں خطاب کریندیں ہوئیں وزیراعظم آکھیا جو فلسطین اچ ظلم تھیندا پئے اتے چالھی ہزار توں ودھ فلسطینیاں کوں بے دردی نال شہید کیتا ڳئے جئیں اچ ہزاراں ٻال شامل ہن۔ سلامتی کونسل دی منظور تھئی قرارداداں اتے عالمی انصاف عدالت ولوں ایں عمل کوں بدترین ظلم آکھیا ڳئے پر مجال اے جو اسرائیلی حکومت تے ایندا تھوڑا وی اثر تھیا ہووے۔ انہاں آکھیا جو آستانہ اچ ایس سی او کانفرنس اچ اسرائیلی جارحیت دے معاملے کوں بھرپور انداز اچ چاتے۔ انہاں آکھیا جو بدقسمتی نال جرمنی سودھے ٻئے ملکاں اچ اساݙے سفارتخانیاں تے حملے کیتے ڳئے، اے افسوسناک واقعے ہن، وزیرخارجہ ایندا فوری نوٹس ڳھدے، آپݨے سفارتخانیاں دی حفاظت اساݙی ذمہ واری اے۔ انہاں ملکاں دے سفیراں کوں سݙ تے شدید احتجاج کرݨا چاہیدے۔ ایں بارے وزارت داخلہ اتے متعلقہ وزارتاں اتے حکام ہک وݙا قدم چیندیں ہوئیں ویزہ رجیم اچ وݙی تبدیلی کیتی اے، ایں تے سارے مبارخ تے مستحق ہن۔ ایندے تحت 126 ملکاں توں تاجراں، ٹریولرز اتے سیاحواں توں ویزہ فیس کائنا ڳھدی ویسی۔ انہاں آکھیا جو ایندے نال الیکٹرانک فارم نال چووی گھنٹیاں اچ ویزہ مل ویسی۔ انہاں آکھیا جو اتحادی حکومت کوں معاشی چیلنجز ہن، کوشش کرݨ اساݙا فرض اے، محنت اتے لگن نال کم کیتا تاں نتیجے بہتر تھیسن۔ انہاں آکھیا جو آئی ایم ایف نال سٹاف لیول معاہدہ کیتے ہݨ ایندی منظوری بورڈ آف گورنز ݙیوݨی اے۔ بجٹ بارے دباؤ ہئی، چیلنجز دے باوجود عوام کوں ریلیف ݙیوݨ کیتے بجٹ اچ وݙے فیصلے کیتے ڳئن۔ اساں بجٹ اچ کٹوتی کر تے مستحق بجلی صارفین کوں پنڄاہ ارب روپے دی سبسڈی ݙتی اے۔ انہاں آکھیا جو اڄوکے ݙینھاں اچ خیبر پختونخوااتے بلوچستان سودھے ملک اچ دہشت گردی دے واقعے ودھ ڳئن، وݙی تعداد اچ سکیورٹی اہلکاراں آپݨی جاناں دا نذرانہ ݙتے۔ ایں بارے انہاں نال مختلف فورمز تے ڳالھ تھئی اے۔ اساں 40 سالیں توں انہاں دے پناہ گزیناں دی میزبانی کریندے پئیوں، او اساݙے بھرا ہن او اتھ رہن، حالات ٹھیک تھیوݨ تے واپسی ویسن۔ پر مزمان نوازی دا اے بدلہ ݙتا ویندا پئے جو انہاں دی سرزمین توں ٹی ٹی پی پاکستان دے خلاف دہشت گردی کرے تاں اے قبول کائنی۔ اساں آپݨے شہریاں دی حفاظت کیتے تیار ہیسے۔ وزیراعظم آکھیا جو نو مئی کوں ہک ٹولے ایں ملک اچ افراتفری مچائی اتے پاکستان دی جڑاں کھوکھلی کرݨ اچ کوئی کسر نی چھوڑی۔ ساریاں کوں پتہ اے جو ماضی اچ انہاں پارلیمنٹ اتے پی ٹی وی تے حملہ کیتا ہئی۔ پاکستان دےخلاف نویں ہتھکنڈے استعمال کریندے پئن۔ پاک فوج دے خلاف منظم پراپیگنڈا کیتا ویندا پئے۔ آرمی چیف اتے انہاں دے ٹبر کوں سوشل میڈیا تے ٹارگٹ کیتا ویندا پئے۔ اے قبول کائنی۔ مسلح فوج اساݙی سرحداں دے محافظ ہن، انہاں دے خلاف بند بدھݨا پوسی، پاکستان دے فیدے دے تحفظ کیتے ہک قدم وی پچھوں نہ ہٹسوں۔
